06 Dóms- og kirkjumálaráðuneyti

Lagt er til að fjárheimild dóms- og kirkjumálaráðuneytis verði aukin um 484,2 m.kr.

210 Héraðsdómstólar.
1.01 Héraðsdómstólar. Óskað er eftir 2,9 m.kr. hækkun á fjárheimild héraðsdómstóla vegna flutnings héraðsdóms Vestfjarða í nýtt húsnæði en við það eykst rekstrar- og leigukostnaður. Við það er miðað að dómurinn flytji á miðju þessu ári.
6.01 Tæki og búnaður. Lagt er til að veitt verði 8 m.kr. framlag vegna flutnings héraðsdóms Vestfjarða í nýtt húsnæði og til kaupa á húsbúnaði, brunavarnarkerfi o.fl.

303 Ríkislögreglustjóri.
1.01 Ríkislögreglustjóri. Gert er ráð fyrir 9 m.kr. viðbótarframlagi til að fjölga störfum lögreglumanna við efnahagsbrotadeild um tvo. Málum deildarinnar fjölgar stöðugt og verða sífellt umfangsmeiri. Þar getur t.d. verið um að ræða auðgunarbrot, listaverkafalsanir, brot á skattalögum, verðlags- og samkeppnislögum, lögum um verðbréfaviðskipti, lögum um stjórn fiskveiða o.fl. Þá koma fyrirvaralaust upp verkefni sem kalla á skjótar aðgerðir embættisins, s.s. vegna fíkniefnamála og annarra umfangsmikilla sakamála sem mikilvægt er að dragist ekki á langinn að rannsaka. Gert er ráð fyrir auknu framlagi til stofnunarinnar vegna þessara mála í frumvarpi til fjárlaga fyrir árið 2003.

305 Lögregluskóli ríkisins.
1.01 Lögregluskóli ríkisins. Farið er fram á viðbótarframlag að fjárhæð 91 m.kr. til að standa undir dagpeningagreiðslum, vaktaálagi og ferðakostnaði lögreglunema á grundvelli dóms sem gekk í Hæstarétti um kjarasamningsbundinn rétt þeirra. Um er að ræða fimm árganga lögreglunema en kostnaður getur verið mismunandi eftir því hve margir nemendur eru búsettir á landsbyggðinni. Framangreind fjárhæð miðast við áfallinn kostnað.

331 Umferðarráð.
1.01 Yfirstjórn. Í frumvarpinu eru millifærðar samtals 11,7 m.kr. af fjárlagalið Umferðarráðs á fjárlagalið Umferðarstofu en það er ný ríkisstofnun sem tekur til starfa 1. október 2002 á grundvelli nýrra laga. Af þeirri fjárhæð eru 10,9 m.kr. af viðfangsefninu 1.01 Yfirstjórn og 0,8 m.kr. af viðfangsefninu 1.11 Ökuhermar fyrir grunnskólabörn. Sjá nánar í skýringum við fjárlagaliðinn 06-333 Umferðarstofa.
1.11 Ökuhermar fyrir grunnskólabörn. Í frumvarpinu eru millifærðar samtals 11,7 m.kr. af fjárlagalið Umferðarráðs á fjárlagalið Umferðarstofu eins og nánar er greint frá í skýringum við fjárlagaliðinn 06-333 Umferðarstofa.

333 Umferðarstofa.
1.01 Umferðarstofa. Í frumvarpinu eru millifærð alls 114,1 m.kr. útgjaldaheimild og 27,2 m.kr. sértekjuáætlun, eða alls 86,9 m.kr. framlag nettó, á fjárlagalið Umferðarstofu af liðunum 06-331 Umferðarráð, 06-335 Skráningarstofan hf. og 1.63 Tölvumiðstöð dómsmálaráðuneytisins. Umferðarstofa er ný ríkisstofnun sem tekur til starfa 1. október 2002 á grundvelli nýrra laga. Markmiðið með lagasetningunni var að koma á heildstæðu skipulagi á stjórnsýslu umferðarmála með því að sameina verkefni Skráningarstofunnar ehf. og Umferðarráðs og ýmis verkefni dómsmálaráðuneytisins. Ekki er gert ráð fyrir því að samruninn leiði til útgjaldaauka fyrir ríkissjóð. Ráð er fyrir því gert í lögunum að tekjustofnar Umferðarstofu verði þeir sömu og voru hjá Skráningarstofunni ehf. og Umferðarráði. Þar er um að ræða 36 m.kr. árlegar skatttekjur af umferðaröryggiseftirlitsgjaldi og um 230 m.kr. skatttekjur af skráningargjöldum ökutækja sem færast á tekjuhlið ríkissjóðs en er varið til þessarar starfsemi. Því til viðbótar kemur árlegt framlag úr ríkissjóði sem rann áður til Umferðarráðs og tölvumiðstöðvar ráðuneytisins og nemur um 81 m.kr. á verðlagi í dag. Hin nýja stofnun tekur til starfa 1. október og er framsetning í fjáraukalögum við það miðuð að fjórðungur af fjárveitingu Umferðarráðs, Skráningarstofu hf. og tölvumiðstöðvar dómsmálaráðuneytisins verði millifærður inn á nýjan fjárlagalið Umferðarstofu, eins og nánar er tilgreint í skýringum við viðkomandi fjárlagaliði. Í frumvarpinu er einnig gert ráð fyrir að fjármögnunarliðurinn „Greitt úr ríkissjóði" hækki um 15 m.kr. Útgjaldaheimild stofnunarinnar verður óbreytt á rekstrargrunni eftir sem áður. Um er að ræða viðskiptahreyfingu á ríkistekjum stofnunarinnar af skráningargjaldi ökutækja sem á rætur að rekja til þess að álagning gjaldanna færist á hendi Umferðarstofu þegar stofnunin tekur til starfa þann 1. október. Skráningargjöldin eru innheimt um tveimur mánuðum eftir að þau eru lögð á og mun því hluti gjalda, sem voru lögð á fyrir 1. október verða innheimt síðar og skila sér inn í rekstur Skráningarstofunnar hf. en fyrirhugað er að félaginu verði slitið um næstu áramót og að eftirstöðvar renni í ríkissjóð. Viðskiptahreyfingin svarar til þessa mismunar á álögðum og innheimtum skráningargjöldum þann 1. október nk.

335 Skráningarstofan hf., skráningargjöld ökutækja.
1.11 Skráningarstofan hf., skráningargjöld ökutækja. Í frumvarpinu eru millifærðar 57,5 m.kr. af fjárlagalið Skráningarstofunnar á fjárlagalið Umferðarstofu eins og nánar er greint frá í skýringum við fjárlagaliðinn 06-333 Umferðarstofa.

390 Ýmis löggæslu- og öryggismál.
1.10 Ýmis löggæslukostnaður. Í frumvarpinu er lagt að fjárheimild þessa fjárlagaliðar verði aukin alls um 55,8 m.kr. af þremur tilefnum. Í fyrsta lagi er gerð tillaga um 22,7 m.kr. aukafjárveitingu vegna kostnaðar sem féll til við löggæslu við heimsókn forseta Kína til Íslands í júní á þessu ári. Launakostnaður löggæsluembætta nam tæplega 18 m.kr. en annar rekstrarkostnaður sem féll til er meðal annars vegna læknis, sjúkrabifreiða, leigu á tækjum og bifreiðum. Í öðru lagi er lagt til að veitt verði 19,4 m.kr. framlag til viðbótar við 50 m.kr. framlag í fjárlögum 2002 sem ætlað var til löggæslu í tengslum við ráðherrafund NATO hér á landi í maí 2002. Umframkostnaðurinn stafar meðal annars af mun hærri kostnaði á Keflavíkurflugvelli en gert var ráð fyrir í upphaflegum áætlunum embættis ríkislögreglustjóra, hærri launakostnaði á nær öllum embættum sem tóku þátt í löggæslunni vegna aukinna krafna um öryggi sem fram komu á síðari stigum undirbúnings fundarins o.fl. Í þriðja lagi er farið fram á að veitt verði 13,7 m.kr. fjárveiting til að standa undir hækkun iðgjalda af viðbótartryggingu lögreglumanna en dómsmálaráðuneytið hefur greitt helming iðgjaldanna á grundvelli bréfs frá fjármálaráðherra 1984 um þátttöku ríkisins í þessari tryggingu. Tillaga um hækkun fjárheimildarinnar snýr annars vegar að þeim kostnaði sem féll til á árinu 2001, 2,4 m.kr., og hins vegar að viðbótarútgjöldum á þessu ári. Samkvæmt nýju samkomulagi greiðir ríkið allan kostnað af iðgjöldunum og má ætla að hann verði um 16 m.kr. á þessu ári en framlag í fjárlögum er áætlað 4,7 m.kr. þannig að fjárvöntun vegna þessa árs nemur 11,3 m.kr. Tryggingarnar voru boðnar út og fyrir liggur tilboð sem felur í sér að kostnaður verður um 20 m.kr. á ársgrundvelli.

395 Landhelgisgæsla Íslands.
1.90 Landhelgisgæsla Íslands. Gerð er tillaga um 30 m.kr. viðbótarframlag vegna rekstrarhalla Landhelgisgæslunnar í lok ársins 2001. Fjárheimildin er í samræmi við tillögur starfshóps dómsmálaráðherra sem fjallaði um málið en aðild að honum áttu fulltrúar Alþingis, fjármálaráðuneytis, Landhelgisgæslunnar og dómsmálaráðuneytis. Það var mat starfshópsins að almennur rekstur Landhelgisgæslunnar gæti orðið innan ramma fjárlaga á árinu 2002 enda verði áfram beitt ýtrasta aðhaldi í rekstrinum. Það sem veldur erfiðleikum er verulegur uppsafnaður greiðsluvandi sem ekki verður séð að takist að vinna á miðað við óbreytt hlutverk Landhelgisgæslunnar. Er aðallega um að ræða vanda sem hefur safnast upp vegna aukins kostnaðar við flugrekstur og mikils viðhalds á skipum og flugvélum.
5.41 Viðhald skipa og flugfarkosta. Farið er fram á 90 m.kr. fjárheimild vegna halla á viðhaldslið Landhelgisgæslunnar í lok árs 2001 í samræmi við niðurstöður starfshóps dómsmálaráðherra eins og áður segir.

433 Sýslumaðurinn á Selfossi.
1.01 Yfirstjórn. Farið er fram á 50 m.kr. hækkun á fjárveitingu vegna uppsafnaðs rekstrarvanda sýslumannsembættisins á Selfossi í lok árs 2001. Í skýrslu Ríkisendurskoðunar í júlí 2002 um fjárhagsstöðu embættisins kemur fram að uppsafnaður vandi muni að óbreyttu þrengja verulega að fjárhag embættisins á næstu árum og ekki verði séð hvernig embættið muni leysa úr þeim vanda nema á mjög löngum tíma án verulegrar skerðingar á þjónustu. Gerðar hafa verið ráðstafanir til þess að reksturinn verði í samræmi við fjárheimildir frá og með árinu 2002.

490 Ýmis rekstrarkostnaður sýslumannsembætta.
1.10 Ýmis sameiginlegur kostnaður. Gerð er tillaga um 15 m.kr. viðbótarfjárheimild til að draga úr uppsöfnuðum halla nokkurra smærri sýslumannsembætta sem eiga við verulegan rekstrarvanda að stríðar. Ljóst er að halli hjá sumum embættum er það mikill að ekki verður unnið á honum nema með verulegum niðurskurði á löggæslu og annarri þjónustu.
1.63 Tölvumiðstöð dómsmálaráðuneytisins. Lagt er til að veitt verði 12 m.kr. viðbótarfjárheimild til að fella niður halla tölvumiðstöðvarinnar. Þegar þetta viðfangsefni var fyrst sett fram í fjárlögum 2000 var fjárþörf miðuð við að tiltekinn hluti fengist endurgreiddur vegna virðisaukaskatts af sérfræðiþjónustu. Á því stigi var gerður fyrirvari um þá áætlun þar sem ekki var ljóst hve stórt hlutfall flokkaðist sem sérfræðiþjónusta. Þessi áætlun reyndist vera of há og endurgreiðslan hefur í reynd verið mun lægri en reiknað var með. Í annan stað eru millifærðar 57,5 m.kr. af fjárlagalið tölvumiðstöðvar dómsmálaráðuneytisins á fjárlagalið Umferðarstofu, eins og nánar er greint frá í skýringum við fjárlagaliðinn 06-333 Umferðarstofa.

501 Fangelsismálastofnun ríkisins.
1.01 Fangelsismálastofnun ríkisins. Gerð er tillaga um að hækka fjárheimild Fangelsismálastofnunar um 25 m.kr. vegna aukins rekstrarkostnaðar sem fylgir fjölgun fanga í afplánun. Samanlagður refsitími sem barst til fullnustu árið 2001 var 241 ár en var 142 ár á árinu 1999 og svarar það til 70% aukningar á tveimur árum. Lagt er til að fjárveiting verði aukin um 5,6 m.kr. vegna stækkunar á húsnæði Fangelsismálastofnunar sem tekið var í notkun þann 15. mars sl. Húsnæðið er nú 604 fm en var áður 411 fm. Vegna þessa hækkar leiga um 1,2 m.kr. á ársgrundvelli en um rúmlega 0,9 m.kr. á þessu ári. Kostnaður vegna ræstingar, sameiginlegur kostnaður húseignar vegna hita, rafmagns í sameign, húsvörslu og fleira er talinn nema alls um 0,6 m.kr. á þessu ári. Kostnaður vegna húsgagna- og tölvubúnaðarkaupa auk breytinga á öryggiskerfi nemur um 4 m.kr. Alls nemur fjárþörf vegna stækkunarinnar á húsnæðinu því 5,6 m.kr. á þessu ári.

701 Þjóðkirkjan.
1.01 Biskup Íslands. Gerð er tillaga um 82,3 m.kr. aukafjárveitingu vegna hækkunar á launum presta, prófasta, biskupa og starfsmanna biskupsstofu í samræmi við samning ríkis og kirkju um rekstur þjóðkirkjunnar. Launaliður kirkjunnar hækkar vegna úrskurða kjaranefndar á árinu.

707 Kristnisjóður.
1.10 Kristnisjóður. Lagt er til að framlag í Kristnisjóð hækki um 7,6 m.kr. í samræmi við ákvæði í samningi ríkis og kirkju en framlagið í sjóðinn er miðað við 16 prestslaun og hækkar vegna úrskurða kjaranefndar á árinu.