13 Hagstofa Íslands

Lagt er til að fjárheimild Hagstofu Íslands verði aukin um 137,5 m.kr.

101 Hagstofa Íslands, aðalskrifstofa.
1.01 Yfirstjórn. Farið er fram á 54 m.kr. fjárveitingu. Með lögum nr. 51/2002 var Þjóðhagsstofnun lögð niður þann 1. júlí sl. og verkefni þau sem hún sinnti flutt til fjármálaráðuneytisins og Hagstofu Íslands. Vegna þessa er í frumvarpi til fjárlaga fyrir árið 2003 lögð til 100 m.kr. hækkun fjárveitingar til Hagstofu Íslands og 44,1 m.kr. hækkun fjárveitingar til fjármálaráðuneytisins. Í samræmi við framangreint er hér lagt til að fjárveiting til Hagstofunnar hækki um 50 m.kr. auk þess sem samsvarandi tillaga um 22 m.kr. hækkun fjárveitingar er gerð hjá fjármálaráðuneyti. Á móti fellur niður helmingur fjárveitingar Þjóðhagsstofnunar árið 2002 hjá forsætisráðuneytinu. Einnig er óskað eftir 4 m.kr. fjárveitingu til húsaleigu og reksturs á nýju húsnæði Hagstofu Íslands. Hagstofan fær afhent nýtt leiguhúsnæði að Borgartúni 21A í byrjun desember. Húsaleiga í einn mánuð er 3,4 m.kr. fyrir utan rekstrarkostnað.
6.01 Tæki og búnaður. Farið er fram á 62,5 m.kr. fjárveitingu til kaupa á ýmsum búnaði í nýtt húsnæði sem Hagstofan fær afhent í byrjun desember næstkomandi. Kostnaður við tölvulagnir og -tengingar ásamt símkerfi og öryggiskerfum er áætlaður 29 m.kr., kostnaður við kaup á ýmsum húsbúnaði, innréttingum og tækjum er talinn vera 22 m.kr., nýjar vinnustöðvar fyrir fyrrverandi starfsmenn Þjóðhagsstofnunar kosta 6 m.kr. og ófyrirséður kostnaður er 5,5 m.kr.
6.21 Húsnæði. Farið er fram á 21 m.kr. fjárveitingu vegna kostnaðar við flutning, ýmsan frágang og breytingar sem gera þarf innanhúss á nýju húsnæði Hagstofu Íslands til að húsnæðið nýtist betur og falli vel að þörfum Hagstofunnar.